எல்லை (EEZ) பகுதியில் ஈரான் கடற்படைக்கு சொந்தமான போர்க்கப்பல் ஒன்று தாக்கப்பட்டு மூழ்கியதாக தகவல்கள் வெளியாகியுள்ளன. இந்தச் சம்பவத்தில் 100-க்கும் அதிகமானோர் காணாமல் போயுள்ளதாகவும், பலர் காயமடைந்துள்ளதாகவும் தெரிவிக்கப்படுகிறது.
தாக்குதலுக்கு உள்ளானது ஈரான் கடற்படையின் தெற்கு படைக்கு சொந்தமான IRIS Dena என்ற மவுட்ஜ் வகை போர்க்கப்பல் ஆகும். இது அமெரிக்க நீர்மூழ்கிக் கப்பல் ஒன்றின் டார்பிடோ தாக்குதலால் மூழ்கியதாக கூறப்படுகிறது.
எனினும், சம்பவம் இலங்கையின் நிலப்பரப்பு கடல் எல்லைக்கு வெளியே நடந்ததாக அதிகாரிகள் தெரிவித்துள்ளனர்.
காலி தெற்கில் 40 கடல் மைல் தொலைவில் அவசர அழைப்பு
கப்பல் காலி நகரத்தின் தெற்கில் சுமார் 40 கடல் மைல் தொலைவில் பயணித்துக் கொண்டிருந்தபோது அவசர உதவி கோரிக்கை அனுப்பியதாக தெரிவிக்கப்படுகிறது.
சர்வதேச கடல் விதிகளின்படி, இலங்கையின் தேடுதல் மற்றும் மீட்புக் கடல் பகுதியில் இந்தச் சம்பவம் இடம்பெற்றதால், இலங்கைக் கடற்படையினர் உடனடியாக நடவடிக்கை எடுத்ததாக கடற்படை பேச்சாளர் கமாண்டர் புத்திக சம்பத் தெரிவித்துள்ளார்.
“இந்தச் சம்பவம் இலங்கையின் சர்வதேச தேடுதல்-மீட்பு பொறுப்பு பகுதியில் ஏற்பட்டதால், சர்வதேச கடல் கடமைகளின் அடிப்படையில் நாங்கள் அவசர அழைப்புக்கு பதிலளித்தோம்” என்று அவர் கூறினார்.
32 பேர் மீட்பு
சுமார் 180 பேர் இருந்ததாகக் கூறப்படும் கப்பலில் இருந்து ஆரம்ப கட்டமாக 32 கடற்படை வீரர்கள் மீட்கப்பட்டு காலி - கராப்பிட்டிய மருத்துவமனைக்கு அனுப்பப்பட்டுள்ளனர். மேலும் சில உடல்களும் சம்பவ இடத்தில் இருந்து மீட்கப்பட்டுள்ளதாக அதிகாரிகள் தெரிவித்துள்ளனர். தேடுதல் மற்றும் மீட்பு நடவடிக்கைகள் தொடர்ந்து நடைபெற்று வருகின்றன.
அமெரிக்க பாதுகாப்புச் செயலாளர் உறுதிப்படுத்தல்
இந்த தாக்குதலை அமெரிக்கா மேற்கொண்டதாக பேட் ஹெக்சத் (Pete Hegseth) தெரிவித்துள்ளார்.
“சர்வதேச கடலில் தன்னை பாதுகாப்பாக இருப்பதாக நினைத்த ஈரான் போர்க்கப்பலை அமெரிக்க நீர்மூழ்கிக் கப்பல் டார்பிடோ மூலம் மூழ்கடித்தது” என்று அவர் கூறியுள்ளார்.
இந்த தாக்குதல் செவ்வாய்க்கிழமை இரவு அமெரிக்க கடற்படையின் நீர்மூழ்கிக் கப்பல் மூலம் மேற்கொள்ளப்பட்டதாகவும் தெரிவிக்கப்பட்டுள்ளது.
இந்தியாவில் நடந்த கடற்படை அணிவகுப்பில் கலந்துகொண்ட கப்பல்
இந்தக் கப்பல் இந்தியாவின் விசாகப்பட்டினத்தில் நடைபெற்ற சர்வதேச கடற்படை அணிவகுப்பு நிகழ்ச்சியில் கலந்து கொண்டு ஈரானுக்கு திரும்பிக் கொண்டிருந்ததாக தகவல்கள் தெரிவிக்கின்றன.
அந்த நிகழ்வில் இலங்கை கடற்படையின் SLNS Sagara மற்றும் SLNS Nandimithra கப்பல்களும் கலந்து கொண்டிருந்தன.
இலங்கை அதிகாரிகளின் விசாரணை
கப்பல் கொழும்பு துறைமுகத்தில் தங்க அனுமதி கோரியிருந்ததாக தகவல்கள் வெளியானாலும், அதுகுறித்து தற்போது கருத்து தெரிவிக்க முடியாது என்று கடற்படை பேச்சாளர் தெரிவித்துள்ளார்.
சம்பவத்தின் உண்மையான காரணம் தொழில்நுட்ப விசாரணைக்குப் பிறகு மட்டுமே தெளிவாகும் என்றும் அவர் கூறினார்.
தேசிய பாதுகாப்பு விவாதம்
இந்த தாக்குதல் இலங்கையின் கடல் அதிகாரப் பகுதிக்குள் நடந்ததால், இது தேசிய பாதுகாப்பு தொடர்பான முக்கிய பிரச்சினையாகும் என்று எதிர்க்கட்சிகள் குற்றஞ்சாட்டியுள்ளன.
நவீன போரில் ட்ரோன் மற்றும் நீர்மூழ்கி தாக்குதல்கள் அதிகரித்து வரும் நிலையில், கடற்படைகளுக்கு வலுவான ரேடார் மற்றும் வான்வழி பாதுகாப்பு அமைப்புகள் அவசியமாகியுள்ளன என்று பாதுகாப்பு வட்டாரங்கள் தெரிவித்துள்ளன.
நிதி சவால்கள் இருந்தாலும், கடற்படை திறன்களை மேம்படுத்துதல் மற்றும் நவீன பாதுகாப்பு தொழில்நுட்பங்களில் முதலீடு செய்வது அவசியம் எனவும் அவர்கள் வலியுறுத்தியுள்ளனர்.