ஈரான் விடுத்த பதில் தாக்குதல்கள் வளைகுடா பிராந்தியத்தின் பல நாடுகளைச் சென்றடைந்துள்ளன.
தற்போது லெபனானும் இப்போரில் உள்வாங்கப்பட்டுள்ள நிலையில், உலகளாவிய வர்த்தகம் பெரும் பாதிப்புக்குள்ளாகியுள்ளதுடன், மசகு எண்ணெய் விலையும் சடுதியாக அதிகரித்துள்ளது.
ஈரானின் வான் மற்றும் கடற்படை இலக்குகள் மீது வெற்றிகரமான தாக்குதல்கள் நடத்தப்பட்டுள்ளதாக போரின் நான்காம் நாளில் அமெரிக்க ஜனாதிபதி டொனால்ட் ட்ரம்ப் தெரிவித்தார்.
"அனைத்தும் தரைமட்டமாக்கப்பட்டுள்ளன," எனக் குறிப்பிட்ட அவர், இத்தாக்குதல்களை நியாயப்படுத்தினார். "அணுசக்தி பேச்சுவார்த்தைகள் தோல்வியடைந்தால், ஈரான் முதலில் தாக்குதல் நடத்தத் திட்டமிட்டிருந்தது," என அவர் மேலும் கூறினார்.
இந்தக் கூட்டுத் தாக்குதல்களுக்குப் பதிலடியாக, சவூதி அரேபியா மற்றும் குவைத்தில் உள்ள அமெரிக்கத் தூதரகங்கள் மீது ஈரான் தாக்குதல் நடத்தியுள்ளது.
இதனைத் தொடர்ந்து வொஷிங்டன் குறித்த இரு தூதரகங்களையும் லெபனானில் உள்ள தனது தூதரகத்தையும் மூடியுள்ளதுடன், அத்தியாவசியமற்ற பணியாளர்கள் மற்றும் அவர்களின் குடும்பத்தினரை உடனடியாக மத்திய கிழக்கிலிருந்து வெளியேறுமாறு உத்தரவிட்டுள்ளது.
நேற்று துபாயில் உள்ள அமெரிக்கத் தூதரகமும் ஈரானின் தாக்குதலுக்கு உள்ளானது. அடுத்த இரண்டு வாரங்களுக்கு போர் நடவடிக்கைகள் திட்டமிடப்பட்டுள்ளதாகவும், குறித்த காலத்திற்கு முன்னதாகவே இலக்குகளை அடைந்து வருவதாகவும் இஸ்ரேல் அறிவித்துள்ளது.
ஈரானின் அடுத்த தலைவராக யார் வருவார்கள் என ஊடகவியலாளர்கள் வினவியபோது, "நாங்கள் எதிர்பார்த்திருந்த பலர் இப்போது உயிருடன் இல்லை," என ஜனாதிபதி ட்ரம்ப் பதிலளித்தார்.
நேற்று நாள் முழுவதும் ஈரானின் தலைநகர் டெஹ்ரான் மீது தொடர்ச்சியான வான் தாக்குதல்கள் நடத்தப்பட்டன. குண்டுவெடிப்புச் சத்தங்களால் நகரம் அதிர்ந்தது. ஈரானின் அரச வானொலியான IRIB மற்றும் மெஹ்ராபாத் விமான நிலையத்திற்கு அருகிலுள்ள பகுதிகள் இஸ்ரேல் மற்றும் அமெரிக்கத் தாக்குதல்களால் பெரும் சேதமடைந்தன.
கோம் (Qom) நகரில் ஈரானின் அடுத்த தலைவரைத் தெரிவு செய்ய மூத்த தலைவர்கள் கூடும் மண்டபமும் தரைமட்டமாக்கப்பட்டது. இதில் உயிரிழந்தவர்களின் விபரங்கள் வெளியாகாவிட்டாலும், பல சிரேஷ்ட தலைவர்கள் கொல்லப்பட்டுள்ளதாக ட்ரம்ப் உறுதிப்படுத்தினார்.
மக்கள் நகரங்களை விட்டு வெளியேறியதால் டெஹ்ரான் தற்போது ஒரு 'பேய் நகரம்' (Ghost Town) போல காட்சியளிக்கிறது. உலகப் பங்குச்சந்தைகள் வீழ்ச்சியடைந்து வருவதுடன், மத்திய கிழக்கின் எரிசக்தி விநியோகத் தடை காரணமாக உலகளாவிய பணவீக்கம் அதிகரித்துள்ளது. மசகு எண்ணெய் விலை 5 சதவீதத்தினாலும், ஐரோப்பாவின் திரவ இயற்கை எரிவாயு (LNG) விலை 40 சதவீதத்தினாலும் உயர்ந்துள்ளன.
இஸ்ரேலின் தாக்குதல் திட்டத்தை முன்னரே அறிந்து அதில் இணைந்துகொண்டதாக அமெரிக்க இராஜாங்கச் செயலாளர் மார்க் ரூபியோ தெரிவித்துள்ளார். ஈரான் அரசாங்கம் பதவியிலிருந்து அகற்றப்பட வேண்டும் என இஸ்ரேல் வலியுறுத்தும் அதேவேளை, ஈரானின் எல்லைக்கு அப்பாற்பட்ட தாக்குதல் நடத்தும் திறனை முடக்குவதே தமது நோக்கம் என அமெரிக்கா சுட்டிக்காட்டியுள்ளது.