மூன்றாவது நாளாகவும் உயர்வைக் கண்டுள்ளது.
அமெரிக்கா மற்றும் இஸ்ரேல் ஆகிய நாடுகள் ஈரானுக்கு எதிராக போர் பிரகடனம் செய்ததைத் தொடர்ந்து, நேற்று (02) ஈரான் ஹோர்முஸ் நீரிணையை (Strait of Hormuz) மூடியது.
அத்துடன், அப்பகுதி வழியாகச் செல்லும் கப்பல்கள் மீது தாக்குதல் நடத்தப்படும் என்றும் ஈரான் எச்சரித்துள்ளது. இதனால் மத்திய கிழக்கு நாடுகளிலிருந்து கச்சா எண்ணெய் விநியோகச் சங்கிலி கடுமையாகப் பாதிக்கப்பட்டுள்ளது.
பிரெண்ட் கச்சா எண்ணெய் (Brent Crude): ஒரு பீப்பாயின் விலை சுமார் 1.10 டாலர் (1.4%) அதிகரித்து 78.83 டாலராகப் பதிவாகியுள்ளது. நேற்று இதன் விலை 82.37 டாலராக இருந்தது. இது 2025 ஆம் ஆண்டின் ஆரம்பத்திலிருந்து பதிவான மிக உயர்ந்த விலையாகும்.
மேற்கு டெக்சாஸ் இடைநிலை (WTI): இதன் விலை 74 சென்ட்கள் (1%) அதிகரித்து ஒரு பீப்பாய் 71.97 டாலராகப் பதிவாகியுள்ளது.
போர் தீவிரமடைந்துள்ள நிலையில், ஹோர்முஸ் நீரிணையை மூடியுள்ள ஈரான், பிராந்திய எரிசக்தி உள்கட்டமைப்புகளை இலக்கு வைத்துத் தாக்குதல்களை முன்னெடுக்கத் தயாராகி வருவதாகக் காணப்படுகிறது. போர் நீடிக்கும் வரை எரிசக்தி நெருக்கடி மேலும் தீவிரமடையும் என அஞ்சப்படுகிறது.
நேற்று இஸ்ரேலியப் படைகள் லெபனான் மீது தாக்குதல் நடத்தியதற்குப் பதிலடியாக, ஈரான் வளைகுடா நாடுகளின் முக்கிய எரிசக்தி நிலையங்களைத் தாக்கியுள்ளது. ஹோர்முஸ் நீரிணையில் சென்ற எரிபொருள் கப்பல்களும் இந்தத் தாக்குதல்களில் இலக்காகின.
உலகளாவிய எரிபொருள் தேவையில் ஐந்தில் ஒரு பங்கு (20%) சாதாரண நாட்களில் ஹோர்முஸ் நீரிணை வழியாகவே விநியோகிக்கப்படுகிறது. குறிப்பாக ஆசிய நாடுகளான சீனா மற்றும் இந்தியாவுக்குத் தேவையான டீசல், பெட்ரோல் மற்றும் பிற எரிபொருள் தயாரிப்புகள் இங்கிருந்தே செல்கின்றன. உலகளாவிய திரவமாக்கப்பட்ட இயற்கை எரிவாயு (LNG) விநியோகத்தில் 20% இந்த நீரிணை வழியாகவே நடைபெறுகிறது.
தற்போது, இப்பாதை வழியாகச் செல்லும் கப்பல்களுக்கான காப்புறுதி (Insurance) வசதியை நிறுவனங்கள் நிறுத்தியுள்ளன. இதனால் கப்பல்கள் இப்பாதையைத் தவிர்த்துச் செல்ல முயற்சிக்கின்றன. இப்பாதை வழியாகச் செல்லும் எந்தக் கப்பலும் தாக்கப்படும் என்று ஈரானிய புரட்சிகரப் படை எச்சரித்துள்ளது. ஹொண்டுராஸ் கொடியுடன் சென்ற கப்பல் ஒன்றின் மீது ட்ரோன் தாக்குதல் நடத்தப்பட்டுள்ளதாகவும், அது தற்போது தீப்பற்றி எரிவதாகவும் ஈரானிய தரப்பு தெரிவித்துள்ளது.
வரக்கூடிய நாட்களில் சர்வதேச சந்தையில் எரிபொருள் விலை மேலும் அதிகரிக்கக்கூடும் என சந்தை ஆய்வாளர்கள் எச்சரித்துள்ளனர்.
