ஐக்கிய அரபு எமிரேட்ஸில் சுமார் 3 இலட்சத்து 50 ஆயிரம் இலங்கையர்கள் வசித்து வருவதாகவும், அந்நாட்டின் வெளிவிவகார அமைச்சு, பாதுகாப்பு அமைச்சு மற்றும் உள்துறை அமைச்சுகளுடன் இலங்கை தூதரகம் நேரடி தொடர்புகளை பேணிக் கொண்டு வருவதாகவும் அவர் தெரிவித்துள்ளார்.
அதேநேரம், அவசர தேவைகளுக்காக உதவி வழங்குவதற்கென சிறப்பு சேவை ஒன்றை ஐக்கிய அரபு எமிரேட்ஸிலுள்ள இலங்கை தூதரகம் ஏற்பாடு செய்துள்ளதாகவும் அவர் கூறினார்.
போக்குவரத்து, பாதுகாப்பான தங்குமிடங்கள் மற்றும் விமான நிலைய அணுகல் தொடர்பான அறிவுறுத்தல்கள் தூதரகம் மற்றும் டுபாய் துணைத் தூதரகத்தின் அதிகாரப்பூர்வ ஃபேஸ்புக் பக்கத்தின் மூலம் அடிக்கடி வெளியிடப்படுவதால், அவற்றை தொடர்ந்து பார்வையிடுமாறும் அறிவுறுத்தப்பட்டுள்ளது.
மேலும், தற்போது பயணத்தில் இருப்பவர்கள் தங்களது விமான சேவை நிறுவனங்களுடனும் பயண முகவர்களுடனும் தொடர்ச்சியான தொடர்பில் இருக்குமாறும் கேட்டுக் கொள்ளப்பட்டுள்ளது.
அதோடு, அதிகாரப்பூர்வ அறிவிப்புகள் மற்றும் உறுதிப்படுத்தப்பட்ட செய்திகளை மட்டுமே நம்புமாறும், ஐக்கிய அரபு எமிரேட்ஸில் தங்களது குடிமக்களையும், அந்நாட்டிற்கு வருகை தரும் வெளிநாட்டவர்களையும் பாதுகாக்க தேவையான அனைத்து நடவடிக்கைகளும் மேற்கொள்ளப்பட்டு வருவதாகவும் தூதுவர் அருஷா குரே மேலும் தெரிவித்துள்ளார்.