பெரல் கச்சா எண்ணெயின் விலை 100 அமெரிக்க டொலரை மீறக்கூடும் என மூத்த ஒபெக் (OPEC) ஆய்வாளர் ஹெலிமா க்ரொப்ட் தெரிவித்ததாக ராய்டர்ஸ் செய்தி சேவை அறிக்கை வெளியிட்டுள்ளது.
மத்திய கிழக்கு பிராந்தியம் முழுமையான மோதலாக மாறுதல் மற்றும் உலகளாவிய எண்ணெய் போக்குவரத்தின் 20 சதவீதத்திற்கும் அதிகமான பகுதி நடைபெறும் ஹோர்முஸ் நீரிணை மூடப்படுதல் போன்ற காரணிகள் காரணமாக கச்சா எண்ணெய் விலை அதிகரிக்க வாய்ப்புள்ளதாக அந்த ஆய்வாளர்கள் தெரிவித்துள்ளனர் என ராய்டர்ஸ் குறிப்பிடுகிறது.
ஹோர்முஸ் நீரிணை வழியாக எண்ணெய் விநியோகத்தில் இடையூறு ஏற்படும் அபாயம் காரணமாக, கடந்த 27 ஆம் திகதி கச்சா எண்ணெயின் விலை ஒரு பீப்பாய்க்கு 72 முதல் 73 அமெரிக்க டொலர் வரை உயர்ந்துள்ளதாகவும் அந்த அறிக்கை தெரிவிக்கிறது.
அதாவது, அமெரிக்க டொலர் 66 இலிருந்து 72 வரை விலை உயர்வு ஏற்பட்டுள்ளதாக குறிப்பிடப்படுகிறது.
எனினும், விலை உயர்வை கட்டுப்படுத்தும் நோக்கில் ஒபெக் நாடுகள் எண்ணெய் உற்பத்தி மற்றும் ஏற்றுமதியை அதிகரிக்க திட்டமிட்டுள்ளதாக ராய்டர்ஸ் தெரிவிக்கிறது.
அதன்படி, நாளொன்றுக்கு 4 இலட்சத்து 11 ஆயிரம் பீப்பாய்கள் அல்லது அதற்கும் அதிக அளவில் உற்பத்தியை உயர்த்துவது குறித்து ஒபெக் நாடுகள் கலந்துரையாடவுள்ளதாக கூறப்படுகிறது.
தற்போது நாளொன்றுக்கு 1 இலட்சத்து 37 ஆயிரம் பீப்பாய்களுக்கும் குறைவான அளவிலேயே உற்பத்தி நடைபெற்று வருவதாக ராய்டர்ஸ் குறிப்பிடுகிறது.
சவூதி அரேபியா, ஐக்கிய அரபு எமிரேட்ஸ், ஈராக், ஈரான், குவைத், லிபியா, கொங்கோ, அல்ஜீரியா, வெனிசுவேலா மற்றும் காபோன் ஆகிய நாடுகள் ஒபெக் அமைப்பின் உறுப்பினர்களாக உள்ளன.
இந்நிலையில், மத்திய கிழக்கிலிருந்து ஹோர்முஸ் நீரிணை வழியாக மேற்கொள்ளப்படும் எண்ணெய், எரிவாயு மற்றும் ஏனைய கப்பல் போக்குவரத்துகள் தற்போது இடைநிறுத்தப்பட்டுள்ளதாக தெரிவிக்கப்படுகிறது.
தொடர்புடைய கடல் பகுதி மூடப்பட்டுள்ளதாக ஈரான் கப்பல் உரிமையாளர்களுக்கு எச்சரிக்கை விடுத்துள்ளதே இதற்குக் காரணம் என கூறப்படுகிறது.
இந்த நிலைமை தொடர்பாக ஒபெக் உறுப்பினர் நாடுகள் இன்று (மார்ச் 2) சந்தித்து அவசர கலந்துரையாடல் நடத்தவுள்ளதாக ராய்டர்ஸ் செய்தி சேவை தெரிவிக்கிறது.