நிலையத்திலிருந்து மத்திய கிழக்கு நாடுகளை நோக்கிப் புறப்படவிருந்த அனைத்து விமான சேவைகளும் இன்று (01) மாலை 5.00 மணி வரை தற்காலிகமாக இடைநிறுத்தப்பட்டுள்ளன.
இது குறித்து கருத்துத் தெரிவித்த கட்டுநாயக்க விமான நிலைய கடமைநேரப் பொறுப்பதிகாரி, இன்று காலை 6.15 மணி வரை வருகை தரவிருந்த 18 விமானங்களும், புறப்படவிருந்த 25 விமானங்களும் ஏற்கனவே இரத்து செய்யப்பட்டுள்ளதாகத் தெரிவித்துள்ளார்.
நேற்று (28) நண்பகல் கட்டுநாயக்கவிலிருந்து மத்திய கிழக்கு நோக்கிப் புறப்பட்ட 'பிட்ஸ் ஏர்' (FitsAir) மற்றும் 'ஏர் அரேபியா' (Air Arabia) ஆகிய விமானங்களும், வான்பரப்பு முடக்கத்தினால் மீண்டும் கட்டுநாயக்க விமான நிலையத்திற்கே திருப்பி வரவழைக்கப்பட்டுள்ளன.
பயணிகளுக்கான முக்கிய அறிவுறுத்தல்:
மத்திய கிழக்கு நாடுகளுக்கோ அல்லது அந்த வான்பரப்பு ஊடாக ஏனைய நாடுகளுக்கோ பயணிக்கத் திட்டமிட்டுள்ள பயணிகள், விமான நிலையத்திற்கு வருவதற்கு முன்னதாக தத்தமது விமான நிறுவனங்களுடன் தொடர்பு கொண்டு தற்போதைய நிலைமைகளை உறுதிப்படுத்திக் கொள்ளுமாறு விமான நிலைய அதிகாரிகள் கேட்டுக்கொண்டுள்ளனர். அத்துடன், தமது மின்னஞ்சல் (Email) மற்றும் குறுஞ்செய்திகளை (SMS) தொடர்ச்சியாகக் கண்காணிக்குமாறும் அவர்கள் அறிவுறுத்தியுள்ளனர்.
விசா கால அவகாசம் நீடிப்பு:
இதற்கிடையில், நிலவும் அசாதாரண சூழ்நிலை காரணமாக நாட்டை விட்டு வெளியேற முடியாமல் சிக்கியுள்ள வெளிநாட்டுப் பயணிகளுக்கு, குடிவரவு மற்றும் குடியகல்வு கட்டுப்பாட்டாளர் நாயகம் 7 நாட்கள் விசா சலுகைக் காலத்தை வழங்கத் தீர்மானித்துள்ளார்.
மத்திய கிழக்கு பிராந்தியத்திற்கான விமான சேவைகள் பாதிக்கப்பட்ட போதிலும், அவுஸ்திரேலியா, சீனா, மலேசியா, இந்தோனேசியா, இந்தியா, தாய்லாந்து, பிரான்ஸ், இங்கிலாந்து மற்றும் ஜேர்மனி ஆகிய நாடுகளுக்கான விமான சேவைகள் வழமை போன்று இடம்பெறுவதாக அதிகாரிகள் உறுதிப்படுத்தியுள்ளனர்.